Viðtöl og greinar

Hér munu birtast blaðagreinar og viðtöl sem hafa verið skrifuð um Selfossflugvöll eða klúbbmeðlimi í gegnum tíðina.

Grein birt í Dagskránni 15. nóvember 2007 höfundur Einar Elíasson

Óskhyggja SASS um millilandaflugvöll á Suðurlandi.

Þegar maður les það sem sunnlensku héraðsblöðin leggja mesta áherslu á af samþykktum á ný afstaðinni SASS ráðstefnu, kemur manni gömul og margsögð saga í hug, um fyrirgreiðslupólutíkusinn sem var á yfirreið um kjördæmi sitt, fyrir kosningar, ásamt skrifara sínum og spurði kjósendur, hvað hann gæti gert fyrir kjördæmið. Það vantar flugvöll, hrópaði heimamaður í hrifningu sinni. Snéri þingmaðurinn sér þá að aðstoðarmanni sínum, og segir fastmæltur. skrifaðu eitt stykki flugvöll. Þetta þótti hraustlega mælt, en af lítilli fyrirhyggju. Sama má segja um ályktun SASS þingsins, þar var ekki djúpt hugsað.

Stokkseyramýri eða Loftstaðasandur, auðvitað er gott og gaman að láta sig dreyma stóra drauma, vitanlega segja margir já takk, já takk við nýjum, stórum og glæsilegum alþjóðlegum flugvelli á Suðurlandi. Hvað annað !!? Ekki spurning. Nema náttúrlega þeir sem fengju völlinn í sitt nágrenni, þeir segja auðvitað nei takk? nei takk? Ekki hér? ekki hér !!

En hvað segir heilbrigð skynsemi ?

Hún hlýtur að taka mið af reynslunni og spyr auðvita, hver vill borga brúsann ? Varla ríkissjóður, sem hefur árum saman ekki haft fjármagn til að byggja fangelsi fyrir brotamenn þjóðarinnar. Varla ríkissjóður sem skortir pening til að byggja aðra brú yfir Ölfusá sem þó er búin að vera á dagskrá í þrjátíu og fimm ár. Varla ríkissjóður sem ekki á pening til að breikka veginn milli Selfoss og Reykjavíkur fyrr en einhvern tímann í framtíðinni og á ekki pening í Suðurstrandaveg, en ætlar að eyða ómældum peningum og berjast næstu áratugina við að byggja ( ó ) nothæfa höfn í Bakkafjöru og kaupa nýja ferju handa eyjaskeggjum. Svo eitthvað sé nefnt af forgangsverkefnum í héraði sem á allt sitt undir góðum samgöngum. þá eru mjög litlar líkur á að þessi sami ríkissjóður eigi allt í einu tug milljarða til að byggja og reka nýjan stóran millilandaflugvöll á Suðurlandi, fyrir einhvern óþekktan markað. Kannski hefði það verið gáfulegra fyrir SASS að fara fram á markaðskönnun svona í byrjun, það hefði lýst pínulítilli hugsun og ábyrgð, ef sassið vill láta taka sig alvarlega.

Bara endurnýjun tveggja brauta Reykjavíkurflugvallar árin 2000 til 2002 kostaði þá nokkra milljarða og þar hefur enn ekki fengist peningur til að byggja viðunandi flugstöð eftir 50 ára flugrekstur, alltaf notast við nokkra gamla skúra frá stríðsárunum sem Bretinn skildi eftir.

Ríkissjóður er nýtekinn við rekstri Keflavíkurflugvallar og munu á næstu árum þurfa að endurnýja tækjabúnað slökkviliðs og snjóruðningstækja og sjá um viðhald flugbrauta o.fl. sem Kaninn hefur annast og greitt fyrir frá því hann byggði völlinn á stríðsárunum. Það verður örugglega nóg og þungt að draga fé úr ríkissjóði til þeirra framkvæmda á komandi árum, hvað þá í nýjan völl.

En hvað er millilandaflugvöllur ?

Hann er ekki aðeins flugbraut, eða flugbrautir í kross, hann er miklu meira. Millilandavöllur er landsvæði sem tekur yfir nokkra tugi hektara, með mannheldum girðingum í kring, vegna þess að hann er landamærastöð. Þar þarf að vera flugstöð og flugturn, flugumferðastjórn, öflug tollgæsla og öryggisgæsla. Hann þarf einnig flókinn flugleiðsögu og flugöryggiskerfi og alskyns búnað, hann þarf öflugt slökkvilið og tæki, hann þarf stórvirkar snjóruðningsvélar og hálkumælingabíl og sanddreifingartæki. Hann þarf margbrotið jarðlagnakerfi vegna brautaljósa og aðflugsljósa, hann þarf stöðugt og mikið eftirlit og viðhald á brautum, tækjum, ljósabúnaði og leiðsögutækjum. Síðast og ekki síst þarf hann fjölmennt starfslið með sérþekkingu á ýmsum sviðum. Þetta allt þarf einhver að borga og reka. Kannski SASS !!

Með bættum vegasamgöngum hefur innanlandsflug stöðugt verið að dragast saman. Það er fjöldi flugvalla hringinn í kringum landið, sem ekki eru lengur notaðir í áætlunarflugi og sumum þeirra er ekki lengur haldið við. Innanlandsflugið á enn eftir að dragast saman með stöðugt batnandi þjóðvegakerfi og með hálendisvegum sem nú er barist fyrir og á að kosta með einkafjármagni, því ríkið þarf að nota sinn pening í annað.

Þeir flugvellir, sem enn er flogið á eru sumir stórir og góðir, með góðri þjónustu, og nýtast vel sem varavellir í millilandaflugi og eru á öðrum veðursvæðum en Keflavíkurvöllur, það eru vellirnir á Akureyri og Egilstöðum.

Á Hornafirði er góður völlur sem hægt er stækka og efla. Uppi eru óskir heimamanna um að svo verði gert. Vestmannaeyjaflugvöllur og Ísafjarðarvöllur verða aldrei annað en innanlandsvellir. Þetta eru fimm aðal vellirnir, sem áætlunarflug er ennþá flogið á, ásamt nokkrum minni völlum, sem sjaldnar er flogið á, oft vegna þess að um afskekktar byggðir er að ræða svo sem Grímsey. Á Bakkaflugvöll í Landeyjum er ekki flogið áætlunarflug, aðeins hentiflug á smávélum milli lands og eyja. Allir þessir flugvellir þjóna sem varavellir í innanlandsflugi, það gerir Selfossflugvöllur einnig sérstaklega ef hann fær að halda núverandi lengd flugbrauta.

Reykjavíkurflugvöllur

Ef menn eru að bíða eftir að Reykjavíkurflugvöllur verði lagður niður og að þá verði byggður völlur á Suðurlandi, getur biðin orðið nokkuð löng, það gerist ekki fyrr en í fyrsta lagi eftir 15 til 20 ár. Þar fyrir utan verður Reykjavík aldrei flugvallarlaus borg. Ef núverandi flugvelli verður ekki breitt, hann minnkaður og færður til í Vatnsmýrinni, sem kannski er gáfulegast, verður nýr völlur byggður í næsta nágrenni borgarinnar, Flugvöllur sem getur þjónað einkaþotum, flugkennslu og þá líka um leið minnkandi innanlandsflugi.

Stöðugt fleiri íslensk fyrirtæki starfa á alþjóðavettvangi. Stöðugt stækkandi hópur íslendinga sækir vinnu til borga í Evrópu, fólk sem vill vera fljótt í förum og nota til þess litlar einkaþotur í auknum mæli. Nú þegar koma og fara margar slíkar daglega um Reykjavíkurflugvöll, lenda þar fremur en í Keflavík. Þar er um borð fólk sem á viðskipti eða fund í borginni og er svo farið. Auðvita nota íslensku útrásarfyrirtækin þennan lífsstíl í vaxandi mæli, kæra sig ekki um krókinn til Keflavíkur, hvað þá austur í Breiðumýri eða Loftstaðasand eða austur á Rangárvelli, þar sem besta aðstaða er fyrir stóran völl á Suðurlandi ( Þar vildi Kaninn byggja flugvöll og höfn við Þykkvabæ á kaldastríðsárunum en fékk ekki samþykki íslenskra stjórnvalda.)

Ef Reykjavíkurborg ætlar að verða ráðstefnu og viðskiptaborg á alþjóðavísu á komandi árum, sem ég efast ekki um að hún vill vera, þarf hún að hafa öruggan borgarflugvöll í hlaðvarpanum. Svo einfalt er málið. Þannig flugvellir eru í flestum viðskiptaborgum heimsins.

Selfossflugvöllur

Ef við hér í Árborg ætlum að eiga nothæfan og viðráðanlegan flugvöll á svæðinu, þá á hann að vera í hlaðvarpa höfuðstaðar okkar. Að því mun Flugklúbbur Selfoss vinna áfram, sem hingað til, það er eini raunhæfi kosturinn. Annað er bara að drepa málinu á dreif og endar með að enginn flugvöllur verður á Árborgarsvæðinu.

Sem betur fer gerir meirihluti íbúa Árborgar sér grein fyrir þessu og vill að Selfossflugvöllur verði efldur á sínum stað, samkvæmt skoðanakönnun Gallup í febrúar 2003 og aftur 2006 þá studdu 90 % íbúanna völlinn. Þann vilja fólksins hefur bæjarstjórn Árborgar viðurkennt í verki, með því að stefna að því að festa flugvöllinn athugasemdalaust inn á aðalskipulagi svæðisins. Þannig að áframhaldandi uppbygging hans og þróun geti átt sér stað og með nýju deiliskipulag sem verður unnið í frammhaldi af því. Flugvöllur í Árborg er ekki og á ekki að vera eitthvert einkamál Flugklúbbs Selfoss, hann á að vera metnaðarmál allra íbúa Árborgarbúar og baráttumál SASS.

Upphaflega ritað 07.02.2006.

Endurritað 11.11.2007 vegna áliktanna sass

Einar El. fyrrverandi formaður Flugklúbbs Selfoss.

Grein birt í Dagskránni, 25.október 2007:

Grein birt í Dagskránni Selfossi, maí 2007:

Hávaðamælingar við Selfossflugvöll

Flugklúbbur Selfoss gerði í síðustu viku mælingar á hávaða vegna flugumferðar á Selfossflugvelli. Reynt var að líkja eftir aðstæðum þar sem kvartað hefur verið um hávaða vegna flugumferðar. Einnig var til samanburðar mældur hávaði vegna bílaumferðar á nokkrum stöðum á Selfossi og nágrenni.

Niðurstöður þessara mælinga eru þær að hávaði vegna bílaumferðar er víða sá sami eða meiri en hávaði vegna flugvéla á fullu afli í flugtaki. Mælingarnar voru gerðar þriðjudaginn 22. maí sl. kl. 21-21:45, vindur var hægur (5-7 hnútar). Hávaði vegna flugvélar í flugtaki mældist 65-68 decebil (dB). Hávaði vegna bílaumferðar á Eyrarbakkavegi, mældur við húsið Hraunprýði sem er 160 m frá veginum, mældist 60-65 dB. Við íbúðir eldri borgara í Grænumörk á Selfossi (á verönd í raðhúsi) mældist samfelldur umferðarniður þegar engin bíll ók framhjá 65 dB, fólksbílar gáfu þar mælingu upp á 67-68 dB og þegar stórir bílar óku framhjá mældist hávaðinn 70-75 dB. Fólksbíll sem ekur framhjá í íbúðargötu mælist 65-68 dB. Flugklúbbur Selfoss hefur nú óskað eftir að hlutlaus og til þess hæfur aðili, t.d. Heilbrigðiseftirlit Suðurlands, endurtaki þessar mælingar þannig að engin vafi leiki á um niðurstöðurnar.

Íbúar í Grænumörk á Selfossi, og víðar, búa við stöðuga hljóðmengun vegna bílaumferðar alla daga ársins, allan sólarhringinn. Þeir sem búa í þéttbýli verða að sætta sig við slíkt. Flugumferð um Selfossflugvöll er sáralítil eða engin 300 daga ársins, góðviðrisdaga á sumrin getur flugumferðin farið í 30-40 flugtök á dag, svo koma margir dagar þegar ekkert er flogið vegna veðurs. Aldrei er flogið að nóttu til. Ef nauðsynlegt er að takmarka flugumferð um Selfossflugvöll vegna hávaðamengunar þá þarf greinilega að takmarka umferð bíla um Austurveg á Selfossi og víðar.

"Kvartanir" vegna flugumferðar um Selfossflugvöll voru ræddar á fundi bæjarráðs Árborgar 18. maí sl. Í fundargerð frá fundinum segir að "talsvert" sé um að íbúar kvarti undan því að reglum um flugumferð sé ekki fylgt? Bæjarritari Árborgar upplýsti undirritaðan um það nýlega, á fundi sem boðað var til í Ráðhúsi Árborgar vegna þessa vandamáls, að ein kvörtun/fyrirspurn hefði borst frá áramótum vegna flugumferðar um Selfossflugvöll. Er ein kvörtun "talsvert" í 6.000 manna byggðarlagi ? Hver tekur að sér að afbaka sannleikann á þennan hátt og hver er tilgangurinn ? "Stórfréttir" úr bæjarpólitíkinni rata síðan á útsíður héraðsblaðanna og í Glugganum þann 24. maí sl. er haft eftir forseta bæjarstjórnar Árborgar að "verði reglum um flugumferð um Selfossflugvöll ekki fylgt þá verði starfsleyfi flugvallarins endurskoðað" Oft veltir lítil þúfa þungu hlassi !

Flugvallarmálið er sagan endalausa hér á Selfossi. Litla þúfan er svo stór hindrun að bæjarstjórnin treystir sér ekki til að taka ákvörðun um framtíð flugvallarins, ekki einu sinni að boða til fundar í nefnd sem á að ræða það mál en sú nefnd var skipuð í desember 2006.

Selfossflugvöllur er ákjósanlega staðsettur með tilliti til veðurs og vinda. Aðflugs- og brottflugsleiðir eru yfir Ölfusá eða óbyggð/strjálbýl svæði sem lágmarkar hljóðmengun vegna flugumferðar. Flugvöllurinn hefur verið á sínum stað í 34 ár og allir sem núna búa í nágrenni hans vissu, eða máttu vita, að hverju þeir gengu þegar þeir völdu sér búsetu í nágrenni hans. Skynsamt fólk, að vilja vera nálægt flugvellinum og losna þar með við meiri og tíðari hljóðmengun víða annars staðar í bænum.

Helgi Sigurðsson

formaður Flugklúbbs Selfoss

Grein sem birtist í Dagskránni 1.mars 2007

Grein birt í Sunnlenska Fréttablaðinu apríl 2006:

Viljum við hafa flugvöll á Selfossi ?

Það voru stórhuga og framsýnir flugáhugamenn, með Jón I Guðmundsson fyrrverandi yfirlögregluþjón á Selfossi í broddi fylkingar, sem hófu uppbyggingu Selfossflugvallar á 8. áratug síðustu aldar. Með mikilli sjálfboðavinnu og stuðningi góðra aðila var með tímanum byggður upp lítill og góður tveggja brauta flugvöllur ásamt nauðsynlegri aðstöðu svo sem flugskýlum, flugturni o.fl. Síðan þá hefur Selfossflugvöllur gegnt mikilvægu hlutverki, ekki bara fyrir flugáhugamenn til að sinna áhugamáli sínu heldur einnig sem samgöngumannvirki. Völlurinn er vinsæll viðkomustaður einkaflugmanna og einnig mikið notaður í tengslum við leiguflug sérstaklega til Vestmannaeyja og fleiri staða. Ekki má heldur gleyma öryggishlutverki vallarins sem er ótvírætt. Á Selfossi er starfandi öflugur flugklúbbur sem hefur séð um rekstur flugvallarins, með aðstoð m.a. Flugmálastjórnar Íslands, en nú eru blikur á lofti í sambandi við framtíð flugvallarins.

Með vaxandi byggð hefur það sama gerst hér á Selfossi og víða annars staðar að byggðin nálgast flugvöllinn og upp koma raddir um að nú skuli flugvöllurinn víkja. Í nýju aðalskipulagi Árborgar, sem gildir til ársins 2025, varð sú breyting frá fyrra aðalskipulagi, að völlurinn er nú það sem kallað er "víkjandi" sem þýðir að ef talin verður þörf á að nýta landið til annars þá þarf flugvöllurinn að víkja. Sannfæring mín er sú að verði flugvöllurinn látinn víkja verði ekki byggður annar flugvöllur í nágrenni Selfoss. Hvert ætti flugvöllurinn þá að fara og hver ætlar að borga kostnaðinn? Engar tillögur hafa komið fram um það.

Flugklúbbur Selfoss hefur boðist til að minnka flugvöllinn og færa athafnasvæði hans til þannig að landið í kringum völlinn nýtist bænum betur gegn því að framtíð flugvallarins á núverandi stað verði tryggð. Einnig hefur klúbburinn lagt fram tillögur um starfsemi á flugvallarsvæðinu sem að hluta til er í samræmi við starfsemi sem vitað er að bærinn hefur áhuga á að koma á fót. Einnig hafa komið fram tillögur um svokallaða "Flugbyggð" við flugvöllinn en slíkt fyrirkomulag er þekkt víða erlendis. Flugáhugamenn byggja sér þá hús sín þétt við flugvöllinn og geyma flugvélar sínar í flugskýlum við hús sín. Þannig kjósa sumir að búa og margir hafa sýnt þessum tillögum áhuga. Þannig getur flugvöllur og byggð vel farið saman.

Varðandi framtíðarskipulag á flugvallarsvæðinu sem og annars staðar er mikilvægt að gera sér grein fyrir hvar framtíðarmöguleikar okkar bæjarfélags liggja og hvernig við viljum sjá umhverfi okkar þróast. Þegar við tölum um framtíð í þessu samhengi erum við ekki bara að tala um næstu 10-15 ár, við erum að horfa mun lengra fram í tímann. Með auknum frítíma vex þörfin fyrir afþreyingu og með betri fjárráðum vaxa kröfurnar. Merki um slíkt má víða sjá, t.d. í stöðugri fjölgun stærri og betri sumarhúsa og í skipulagningu frístundabyggðar á milli Selfoss og Eyrarbakka svo eitthvað sé nefnt. Sumarhús í dag eru byggð sem heilsárshús og stöðugt fleiri kjósa að búa í þeim allt árið. Á næstu áratugum mun allt landsvæði í okkar nágrenni þróast í þessa átt og inn á milli verða þéttbýliskjarnar sem lifa á þjónustunni við alla hina. Þarna er kominn sérstaða okkar svæðis í framtíðinni ef rétt er á málum haldið.

Staðsetning Árborgar er einstök og hvergi á Íslandi er betra að byggja upp fjölbreytt afþreyingar- og tómstundasvæði en hér. Nálægðin við höfuðborgarsvæðið og langstærsta sumarhúsahverfi landsins og nægt landrými skapar þessa sérstöðu.

Og hvernig vill svo nútímamaðurinn verja tómstundum sínum? Svari hver fyrir sig en ef við ætlum okkur að lifa á þessari sérstöðu okkar þá er fjölbreytni lykilatriðið. Í þessu sambandi styður allt hvað annað. Góð íþróttaaðstaða, hestamennska, dýragarðar, veitinga- og skemmtistaðir, sundlaugagarður, fuglafriðland, bændagisting, listasöfn, skógrækt, heilsuhæli, verslanamiðstöðvar, göngu- og hlaupaleiðir, fjölbreytt og öflug menningarstarfsemi, ráðstefnuaðstaða, golfvellir og svo mætti lengi telja. Að ógleymdum Selfossflugvelli, vel staðsettum í næsta nágrenni við stærsta þéttbýliskjarnann á svæðinu, sem mun með tímanum gegna mikilvægu hlutverki þessari uppbyggingu. Slík framtíðarsýn verður ekki að veruleika nema á löngum tíma og þá með framsýni þeirra sem ráða ferðinni á hverjum tíma.

Nýleg könnun sem Gallup gerði sýndi hug Árborgarbúa til flugvallarins. Mikill meirihluti svarenda hafði jákvæða afstöðu til flugvallarins og einungis 15% vildu flugvöllinn burt. Það heyrist hins vegar mest í þeim sem ásælast land flugvallarins enda tilgangur þeirra annar, þeir hugsa til skemmri tíma. Nægt landrými er fyrir þróun byggðar á Selfossi þó flugvöllurinn fái að vera á sínum stað.

Óvissa um framtíð Selfossflugvallar hefur lamandi áhrif á nauðsynlega uppbyggingu og starfsemi á flugvallarsvæðinu. Því er mikilvægt er að flugvöllurinn verði sem fyrst festur í sessi á núverandi stað í framtíðarskipulagi Árborgar.

Helgi Sigurðsson

Einar Elíasson formaður Flugklúbbs Selfoss 2002-2006:

Hluti af erindi flutt í tilefni af 100 ára afmæli flugsins, árið 2003.

Flug í 100 ár

Upphaf flugs og upphafi flugs á Suðurlandi

Frá örófi alda líklega allt síðan maðurinn reis upp á afturfæturnar og fór að hugsa hefur hann horft öfundaraugum til fugla himinsins og óskað þess að geta svifið um loftin blá eins og þeir. Auðvita hafði hann engin ráð til þess. Kannski er það þessi óskhyggja sem skóp himnaríki í hugum manna, þar sem þeir töldu að biði þeirra fiðraðir englavængir.

Þekkt er sagan um Dedalus og Ikarus. Það má segja að fyrsta flugslysið hafi orðið þegar vaxið bráðnaði í tilbúnum vængjum Ikarusar þegar hann flaug of nálægt sólu, en vængirnir voru gerðir úr fulgafjöðrum og límdir saman með vaxi.

Við Íslendingar eigum okkar útgafu af Dedalusi en hún er skráð af Brynjólfi Jónssyni fræðimanni á innra Núpi eftir aldraðri konu. Snemma á 18. öld var ungur maður á Iðu í Skálholtssókn sem Hinrik Hinriksson hét. Hann var frábær að hagleik og hugviti og bjó sér til fuglsham úr fuglavængjum. Honum tókst þetta svo vel að hann gat hafið sig til flugs og flogið smáspöl, en gekk illa að halda jafnvægi , höfuðið vildi snúa niður en fæturnir upp. Samt áræddi hann að fljúga yfir Hvítá að Skálholtshamri og tókst honum það, þá fannst ráðsettum mönnum nóg komið af fífldirfskunni og tóku af honum haminn og eyðilögðu hann.

Sjálfur Gísli biskup Oddsson í Skálholti færði svipaða sögu í letur á latínu árið 1638.

Svipaða sögu er að segja um mann sem flaug yfir Hvítá í Borgarfirði. Þá sögu myndi ég ekki minnast á nema af því að Jón Þorkelsson afi Jóns Guðbrandssonar þýddi hana á íslensku 1890 og gaf út á prenti ásamt fleiru.

En sagan af stráknum frá Iðu er miklu sennilegri því honum er lýst sem frábærum hagleiks- og hugvitsmanni en til þessa svæðis rekja þeir Forsætisbræður ættir sínar sem meðal annars smíða í dag flugvélar og vindmyllur.

Þegar leið fram á síðari hluta 20. aldar voru margir kallaðir og margar tilraunir gerðar til að fljúga; það var hoppað úr turnum og af klettabrúnum í ótrúlegum flugtækjum, oft með skelfilegum afleiðingum. Þegar kemur fram undir aldamótin 1900 fyrir rúmum 100 árum fóru menn að taka vísindalega á málum sem endaði loks með sigri mannsins yfir þyngdarlögmálinu þegar reiðhjólasmiðirnir, bræðrunum Wilbur og Orville Wright tókst að fljúga tæki sem var þyngra en loft og knúið áfram með vélarafli. Það var 17. desember árið 1903.

Fyrsta flug þeirra var 40 metrar en í þriðju tilraun flugu þeir 230 metra á 59 sek. Þetta var ótvíræður sigur. Árið 1905 komu þeir bræður með þriðju útgáfu vélar sinnar Flyer lll. Þá flugu þeir í 35 mín og 3 sek og höfðu fulla stjórn á tækinu, gátu hækkað sig og lækkað og gátu snúið til hægri og vinstri. Þetta var flugvél. Síðan hefur þróunin ekki stoppað.

Það er merkilegt að sjá hversu þróunin var ör frá Wright bræðrum og öðrum hugvitsmönnum fram yfir fyrra stríðið sem hófst 1914. Frá árinu 1903 til 1914 voru framleiddar um 10 þúsund flugvélar í heiminum. Um stríðslok höfðu verið smíðaðar 177 þúsund flugvélar. Í stríðslok 1918 voru til vélar sem gátu flogið með 200 km hraða og farið í 6 þúsund metra hæð. Þessar vélar voru búnar mörgum vélbyssum . Sprengjuvélar sem gátu borið 1500 kg af sprengjum og höfðu um 500 km. Flugþol - ótrúlega hröð þróun!- Á þessum árum var fyrsta vélin sem var algerlega úr málmi teiknuð af Hugo Junkers.

Eins og fyrr segir lauk stríðinu 1918 og strax 1919 kemur fyrsta flugvélin til Íslands og fyrsta flug hér á landi er farið 1.september 1919 og eru því á þessu ári (2003) um 83 ár frá þeim atburði. Flugið hér á Suðurlandi er jafngamalt , því þann 17. september sama ár er flogið austur fyrir Fjall í fyrsta sinn og lent í Kaldaðarnesi. Flugið tók 25 mín, síðan var flogið um Eyrarbakka, en ekki lent þar, segir í frásögninni, flogið til Reykjavíkur um Tryggvaskála , en sú ferð tók 45 mín. Áfram heldur flugið 18. september en þá er fyrsta flug áætlað til Vestmannaeyja en þar er ekki hægt að lenda vegna loftóróa. Ári síðar 25. júlí 1920 var gerð önnur tilraun til að lenda í Vestmannaeyjum, en tókst ekki heldur af sömu sökum og varð vélin bensínlaus á bakaleiðinni vegna mótvinds og nauðlenti við Fljótshóla í Gaulverjabæjarhreppi.

Í Vestmannaeyjum lenti flugvél á landi ekki fyrr en 1.október 1939 og var það TF- SUX. Sú vél hefur verið gerð upp og var lengi í flugstöðinni í Vestmannaeyjum en er nú komin í Flugsögusafn Íslands á Akureyri. Það má segja að með þessari flugkomu til Eyja hefjist flugáhugi minn þótt ég væri aðeins fjögurra ára gamall en ég man vel eftir þessari vél þar sem hún stóð í túninu fyrir sunnan Helgafell. Næsta flugsögulega atvikið í mínu lífi var þegar herflugvél flaug yfir barnaskólann í Vestmannaeyjum, líklega 1942, og allir strákarnir þutu út í glugga til að reyna að sjá vélina, Þegar kennarinn, sem var Loftur Guðmundsson, síðar þekktur rithöfundur og blaðamaður sá áhuga okkar strákanna breytti hann kennslustundinni í fræðslustund um eðli flugsins og af hverju flugvélar tylldu í loftinu og hvernig loftskrúfan virkaði. Ég man enn eftir ýmsu fleiru sem Loftur fræddi okkur um í þessum tíma. Hef ég síðar undrað mig á hversu fróður hann var um eðli og tækni flugsins. Í þriðja sinn sem ég minnist þess að hafa séð flugvél á þessum tíma var þegar flugvél flaug mjög hátt yfir Eyjarnar og út úr henn datt eitthvað sem ég vissi ekki hvað var fyrr en fallhlíf opnaðist og maður sveif til jarðar, en flugvélin steyptist logandi í hlíðar Helgafells.

Síðar fylgdist ég með byggingu flugvallarins í Vestmannaeyjum en hann var tekinn í notkun 1946 og þá aðeins ein braut sem mig minnir að væri aðeins 600 metra löng í byrjun. Þetta var fyrsti flugvöllur sem Íslendingar gerðu sjáfir. Oft fór ég suður á flugvöll til að fylgast með umferðinni , sem oft var mikil bæði af farþega og einkavélum. Mín fyrsta flugferð var vorið 1947, þá fór ég með Anson vél Loftleiða frá Eyjum til Reykjavíkur, áleiðis í sveit í Mýrdalinn.

Fyrsta flug lítillar einkavélar til Íslands, 1. ágúst 1930.
Lent á Kaldaðarnesbökkum eftir 11 klst. flug frá Orkneyjum.