Árleg árshátið Flugklúbbs Selfoss fór fram síðastliðið föstudagskvöld.  Mæting var með besta móti og var hvert sæti vel setið.   Einar Elíasson lagði til flugskýli sitt undir hátíðina og var það samdóma álit allra að umgjörðin hefði verið einstök, en Einar hefur unnið ötullega að uppsetningu safns um stríðsárin í Kaldaðarnesi.  Veisluþjónusta Óla Olesen sá um kræsingarnar sem voru með besta móti.  Gestir minntust tveggja látinna félaga á árinu, þeirra Sigurðar Karlssonar og Gunnars Þorvaldssonar, með því að rísa úr sætum. Félagi okkar og flugkempa í Flugklúbbi Selfoss, Jón Grímsson (TF-HAL) sagði frá því þegar hann ferjaði TF-HAL til landsins, en Jón flaug vélinni tæplega 6000km leið til Íslands fyrir þáverandi eigendur.  Var þar á ferðinni skemmtileg saga og vel útfærð, en Jón rakti í máli og myndum ferðasöguna.
Verðlaun voru veitt fyrir Pétursbikarinn - lendingarkeppni Flugklúbbs Selfoss en Snorri Jónsson á TF-REX  sigraði örugglega.

Jón Karl Snorrason tók við bikarnum fyrir hönd Snorra sonar síns.

Því næst veittu þeir Ágúst Guðmundsson og Hörður Sverrisson verðlaun fyrir Íslandsmeistaramótið í vélflugi - flugrallý sem haldið var sama dag og lendingarkeppnin.  Þar báru sigur úr býtum þeir Helgi Sigurðsson og Björn Rúriksson á TF-GJA,  Snorri Jónsson og Páll Georgsson á TF-REX voru í öðru sæti og þeir bræður Guðmundur Guðjónsson og Emil Guðjónsson á TF-KRA voru í þriðja sæti.


Helgi Sigurðsson og Björn Rúriksson sigurvegarar í flugrallý 2009 kampakátir með árangurinn.

Flugklúbburinn byrjaði á þeirri skemmtilegu nýjung árið 2007 að tilnefna Flugmann ársins. Sá aðili sem útnefninguna fær þarf m.a. að hafa verið vel virkur í félagsstarfinu og sýnilegur á svæðinu, ásamt því að fljúga mikið.   Komu þar nokkrir góðir félagar til greina en stjórnin var sammála í því að titilinn að þessu sinni fengi Einar Elíasson (TF-PJE)


Einar Elíasson Flugmaður ársins 2009, tekur við farandbikarnum úr hendi Helga Sigurðssonar
formanns Flugklúbbs Selfoss, einnig fylgdi í kjölfarið annar minni til eignar.

Sú nýbreytni var í fyrra að veitt voru Gullmerki Flugklúbbsins, sá aðili sem hlaut Gullmerkið að þessu sinni var Stefán Jóhannsson. Stefán hefur verið dugmikill í starfsemi klúbbsins í fjöldamörg ár og hefur staðið vaktina í turninum lengur en nokkur annar.  Stefán var einn af eigendum TF-EOS sem seld var í sumar og hefur hann einnig séð um bensínsöluna.


Stefán Jóhannsson handhafi Gullmerkis Flugklúbbs Selfoss,
í baksýn má sjá mynd af Stefáni við TF-EOS.


Það var þétt setinn bekurinn í skýli eitt, og var matnum gerð góð skil á öllum borðum.

Fleiri myndir frá kvöldinu má finna í myndasafninu.

Árshátíð Flugklúbbs Selfoss 2009 verður haldin í skýli 1 á Selfossflugvelli föstudaginn 16. október kl. 19:30. Hátíðarkvöldverður, skemmtiatriði, verðlaunaafhendingar o.fl. Verð kr. 3000,- sem greiðist við innganginn. Innifalið er fordrykkur og matur. Ath að ekki er hægt að greiða með kortum.  Makar og aðrir áhugasamir gestir eru að sjálfsögðu velkomnir.

Þátttaka tilkynnist sem fyrst í síma 896 3406 eða á netfang helgi@globaleco.is

Stjórnin

Kjartan Sigurðsson félagi í Flugklúbbi Selfoss og mótordreka flugmaður með meiru, er duglegur með myndavélina í ferðum sínum um landið.  Kjartan er með heimasíðu undir myndirnar sínar sem
heitir einfaldlega www.photo.is   Hann hefur einnig tekið talsvert af myndböndum og hefur hann meðal annars notað til þess mjög fullkomin myndatökubúnað sem festur er á vængendann á drekanum hans.
Hann sendi okkur nokkur myndbönd sem hægt er að sjá með því að smella á tenglana hér fyrir neðan, njótið vel. (ath titlar myndbandanna eru Kjartans)

Flying over Glacier Lagoon - Vatnajökull - Jökulsárlón

Flying over Waterfall Skógafoss

Flying Trike through the hole of Dyrholaey island on  way to  
Skaftafell Vatnajökull Glacier in Iceland

Flying over Reykjavík Viðey on trike in sunset

Gjástykki - Krafla - Leirhnjúkur - Mývatn

Flying around Lake Mývatn

Ingólfshöfði Puffin island

Langisjór Highland

Lakagígar Highland

Hólmur Kirkjubæjaklaustur

Flying over Puffin island Grímsey

River Rafting in Hvítá Glacier River

Hotel Valholl burning in Thingvellir National park

Brimketill - Reykjanesvirkjun

Árleg lendingarkeppni Flugklúbbs Selfoss - Pétursbikarinn - fór fram sunnudaginn 4. október. Keppnin var hluti af Íslandsmóti í vélflugi sem fram fór sama dag. 10 keppendur tóku þátt í lendingarkeppninni sem var hin besta skemmtun, bæði fyrir keppendur og áhorfendur. Aðstæður til flugs voru mjög góðar, 10-15 hnúta vindur af norðaustri en kalt í veðri.  Sigurvegarar að þessu sinni voru:

 1. Snorri Jónsson, TF-REX                        59  refsistig

 2. Guðmundur Guðjónsson, TF-KRA,        91  refsistig

 3. Þorsteinn Magnússon, TF-169,          137  refsistig

Yfirdómari var Kristbjörn Ólafsson og flugumferðarstjórn allan daginn var í höndum Stefáns Jóhannssonar.
Klúbbnum hafa borist myndir sem Hörður Sverrisson tók og er þær að finna hér í myndaalbúminu.
Við þökkum Herði kærlega fyrir afnotin af myndunum.

Snorri Jónsson í einni lendingunni sinni á TF-REX


Björn Rúriksson (tv) og Helgi Sigurðsson (th)
gera klárt fyrir rallý á TF-GJA.