Flugmaður á lítill flugvél (félagi okkar Hjörtur?)  sem var á leið til Ísafjarðar í kvöld ákvað að lenda á Djúpveginum við bæinn Ögur í stað þess að fara alla leið á leiðarenda sökum veðurs. Svartaþoka er nú við Ísafjarðardjúp og því öll flugskilyrði afar slæm.

Flugmaðurinn tók því þá ákvörðun að leita að vegi og lenti vél sinni mjúklega skammt frá bænum Ögri. Var hvorki hann né vélin í neinni hættu. Amar því ekkert að flugmanninum sem mun ætla að láta fyrirberast í vél sinni í nótt. Er svo ætlunin að halda ferðinni áfram í morgunsárið þegar þoku léttir.

TF-FIM á veginum við ögur.  mynd af mbl.is

Á þessari mynd má sjá að vindáttin er komin inn og þar
að auki vindhraðinn líka, eftir langa bið.

Hér má sjá þá félaga við þvottastörfin.  Haraldur fylgist grannt með
og sér til þess að allt fari fram eftir settum reglum.

Fólk naut veðurblíðunnar á meðan beðið var eftur flugi.

Í dag er runninn upp þjóðhátíðardagur Íslands, 17.júní.  Af því tilefni er mikið um dýrðir á Selfossi og einn af föstu liðunum í dagskránni er hið sívinsæla útsýnisflug, en bæjarbúum gefst þá kostur á að fara flugtúr í flugvélum félagsmanna í Flugklúbbi Selfoss.  Sætaverði er mjög stillt í hóf að vanda.   Áætlað er að flugið hefjist um kl 13 og standi til kl 16.  Hafa skal þó í huga að útsýnisflug er háð veðri. Allir hjartanlega velkomnir.

TF-GIN með vængina ákomna.  Til hamingju með þennan áfanga félagar.


Óli undirbýr TF-118 eftir vetrardvalann.

Í vikunni var sáð grasfræi og áburður borinn á braut 15/33 á Selfossflugvelli. (Brautin sem liggur frá Eyrabakkavegi og niður að Ölfusá ) Til að hlífa brautinni verða snertilendingar á henni bannaðar í sumar og mælst er til þess að braut 05/23 sé notuð alltaf þegar það er hægt. Braut 15/33 er ekki lokuð í þeim tilvikum sem flugmenn telja öruggara að nota hana en endilega notið hina brautina alltaf þegar það er hægt.
F.h. stjórnarinnar
Helgi Sigurðsson


Eins og sést er búið að mála þakið á flugstöðinni, enn er talsverð málningarvinna eftir
til að klára nýja útlit vallarsvæðisins.

Í gærkvöldi hófst vinna við að dreifa grasfræi og áburði í braut 15/33 á Selfossflugvelli.  Búið var að fá til verksins tækjabúnað úr ýmsum áttum.  Byrjað var á að slóðadraga alla brautina til að jafna yfirborðið og einnig til að opna jarðveginn fyrir grasfræin. Því næst var blandað í dreifarann áburði og fræi eftir kúnstarinnar reglum.  Tók þessi vinna um 4 tíma og að henni lokinn hófst vinna við völtun, sem mun klárast í dag/kvöld.  Leitað var til helstu gras sérfræðinga sýslunnar með val á grastegund og fyrir valinu varð gras sem mun verða lágsprottið en mjög þétt. Myndir sem Þórir Tryggvason tók frá kvöldinu eru komnar inní myndaalbúmið.

Kári (TF-FFK) hífir áburðarsekkinn í dreifarann hjá Steina (TF-169) og Vigfús (TF-GJA) fylgist grannt með.

Dreifingin í fullum gangi.

Á dögunum var endanlega samþykkt nýtt deiliskipulag fyrir flugvallarsvæðið.  Mun þetta gjörbylta þeirri stöðu sem klúbburinn hefur verið í hingað til.   Einn af félögum okkar, Kári Jónsson (TF-FFK) reið á vaðið og hefur hafið byggingu á 280m2 flugskýli. Húsið verður innflutt og ætlunin er að það verði fullbúið með haustinu.  Gaman verður að fylgjast með byggingunni í sumar.

Búið er að hreinsa upp þann jarðveg sem þarf fyrir bygginguna.

Á dögunum hófst Einar Elíasson handa við smíði á nýju bensínhúsi.  Ekki tók verkið langan tíma, því skömmu síðar var húsið tilbúið.   Búið er að setja það niður á sinn stað, en það stendur á stéttinni við bensíndælunaog er hið reiulegasta.  Verður þetta til mikillar hagræðingar þar sem ekki þarf þá lengur að fara inní brúna húsið eftir bók og lykli.  Mun ganga sami lykill að flugstöðinni og bensín húsinu.  Eina sem vantar núna er gott nafn á bygginguna og er hér með auglýst eftir tillögum að nafngift. Vakin er sérstök athygli flugmanna á því að hæð hússins er vel rúmlega 2 metrar og því hætta á að reka vængi í húsið.

Húsið góða sem bíður eftir nafni.